يمكن محدش كان ممكن ياخد باله منها ... اصلها كانت زي اي بنت .. ويمكن لأنها كانت برده مختلفة عن اي بنت ... قليلين اللي دخلوا حياتها ... و أأقل اللي فضلوا فيها ... كل اللي اتكتبلها انها تعيشه 30 سنة تقريبا
اعرفها من زمان ... بس زادت العلاقة اوي في أخر 1999 ... اول سنة كلية ... بس علاقتي طبعا بأختها ( آلاء - لولا ) طبعا كانت أقوى بكتير .. بحكم حاجات كتير أهمها طريقة التفكير
الخضة اللي اتخضتها من الخبر مش كنت متخيلاها ... اتصدمت من نفسي و من حزني عليها .. اه عشرة و اصحاب و كل حاجة و مع ذلك اتصدمت ... حسيت عمرنا قصير اوي ... اول مرة احس ان الموت قريب مني اوي كده ... سبق أميرة ناس تانية ..ز اصحابي برده ... حمادة و كيمو ... بس المرة دي كانت اصعب .. كانت أقوى .. كانت أقرب ... و يمكن ده اللي ملخبطني لحد دلوقتي ... و اعتقد اني هافضل كده لفترة
امبارح كلمت لولا بليل اطمن عليها ... و ربنا وحده اعلم قد ايه كان نفسي اكون جمبها في الوقت ده ... مش عرفت اقولها ايه تاني غير اني اصبرها و اقولها تقرا ليها قرآن ... لقيت لولا بتقولي إن أميرة قبل ما يتوفاها الله قالتلها تقولي انا و شيرين و رانية اننا مش نزعل منها ... آلاء قالتلي انها فضلت تقولها الكلمة ده كذا مرة
وجعني اوي الكلام و حلفت للولا اني مش زعلانة منها في حاجة و انا فعلا كده ... و كان نفسي إن أميرة هي اللي تسمع مني الكلام ده
إنا لله و إنا إليه راجعون
الله يرحمك يا ميرو و يغفر لك و يتوب عليكي ... كان نفسي تعيشي مبسوطة اكتر ... و مرتاحة أكتر ... و قوية اكتر
بس أكيد المكان اللي فيه دلوقتي احسن بكتير من اللي احنا فيه
أكيد ربنا أحن عليكي من كل اللي هنا ... و مش هاقدر اقول غير ربنا يرحمك و يصبر أهلك
أميرة ... و الله انا مش زعلانه منك ... اه كنت بس خلاص مش بقيت كده
ربنا يصبرك يا لولا ... و أنا بجد كان نفسي اكون معاكي دلوقتي
No comments:
Post a Comment